HAI LIBROS singulares que visten de gala unha literatura nacional e universal como a nosa. Sen estremonías. O libro dos abanos (Palabras no aire) , fermoso e curioso, desfila nesta pasarela. Trátase de trinta e cinco abanos abertos, multicores, con outros tantos creadores que puxeron versos encol dos seus corpos estendidos. Na escolma poética e pictórica áchanse nomes moi representativos da actual lírica galega. «Un galano para os ollos e para a imaxinación», lemos na lapela da obra. Letras e aire.

A idea tivera un precedente nunha exposición celebrada en Vigo no 1922, comentada na escrita de Xosé Filgueira Valverde e que reproduce o seu Sexto Adral (Edicións do Castro, 1990).

O libro dos abanos publicouno no 2002 a editorial compostelá Follas Novas, na súa colección Libros da Frouma en colaboración coa Galería Noroeste, que exhibira nas súas salas ese conxunto de pezas pictóricas e poéticas. Do coidado da edición ocupáronse Luís Alonso e Carmen Fariña. Leva presentación de Marián Diéguez e Antonio Ibáñez, de Noroeste. E púxolle un limiar Anxo Tarrío.

Abanos abertos, anacos de esperanza -como diría Encarna Otero-, verbas acaídas para un novo 25 de xullo.

Autores textos poéticos e abanos: Xosé Mª Álvarez Cáccamo - Manuel Álvarez Torneiro - Vicente Araguas- Xela Arias - Lino Braxe - Darío Xohán Cabana - Arturo Casas - Yolanda Castaño - Emma Couceiro - Estevo Creus - Estíbaliz Espinosa - Miguel Anxo Fernán-Vello - Ramiro Fonte - Manuel Forcadela - Salvador García-Bodaño - Antón Lopo - María do Cebreiro - Gonzalo Navaza - Olaga Novo - Chus Pato - Ánxeles Penas - Luz Pozo Garza - Mª Xose Queizán - Anxo Quintela - Xesús Rábade Paredes - Luis Rei Núñez - Antón Reixa - Xavier Rodríguez Baixeras - Claudio Rodríguez Fer - Ana Romaní - Anxos Romeo - Xavier Seoane - Xohana Torres - Helena Villar Janeiro - Miro Villar.